لسّه مكابر؟
أرفع عنّى السّقف قزازك
المتأبد تحت ترابه
حجب النور
سجنتنا الضّلمه
التّخبيط عبّر عن ذاته
صوابعنا إتخذقت ف عنينا
من بدرى بنعضعض بعض
النّسوان كرهتنا بجد
مش شايفين قدّامهم حد
غير كلاكيع عمّال بتشخبط
وإديهم مسند للخد
من بدرى قاعدين ع الحيطه
مش شايفين آخر للظّيطه
لخبيطه تكتب لخبيطه
والعيطه تتفك بعيطه
والمتعشّم خير بيرفّص
متكهرب خطفاه دحريجه.
م تقولّى يا ابو قلب حنون
ألقاك فين ؟
مش علشان انا بيك مفتون
ولا مستنّى يشدّنى كيفك
وتصّورلى أمل معدوم
أنا مش شايفك غير ف الصوره
ف البراويز فوق الميادين
نفسى ف يوم أطلع واسألها
إنت معانا
ولا مع مين؟
من غير ما اسأل
واضح انك مش ويّانا
ومودينا للمع مين.
ليست هناك تعليقات:
إرسال تعليق