إلى ثورة يوليو وثوّارها .... أهدى تلك القصيدة.
زمن أول/
كانوا هناك
بين تفاصيل الليل
واقفين
النيل واقف يعمل
شاى
والقمرايه ع
الأبواب تتونس بيهم
والأحلام
ترف النّاس الهامش
صوره
تتنفّس ف إدين
المشهد حاضر ليهم
طلع الفجر المدنى
ونادى
ردوا عليه.
وانتى يا عطر
الدنيا يا سلوى
كان النّوم ف
عنيكى يشخبط
والصبحيه ع الشباك
عمّال بتخبط.
وطلعتى من جوّه
شجونك
ثوره بحجم الشوق
للنور
لأمل كان متأجّل
فيكى.
زمن ثان/
السّاعه ع الحيط
بدّور
عين . ميم. لام
همم
تحفر وجهك فوق
القمم
فإذا ظما
صعد إليها دمنا
ديم.
بكره كان ف الحفله
أمير
فك رموز الدوخه
وعدّى
على صدره اسامينا
اللمه
ماشيه فوق الشوف
طوابير.
زمن ثالث/
وإحنا ف عز الحفله
ياسلوى
قطعوا النّور
القلب إتشعبط ف
نشاز
مسامير تحت كوتش
السّكه
وقفت بينا
لمّا رجعنا قرينا
عنينا
لقيناها بترسم
عكاكيز.
زمن رابع /
واترسمت ع النور
قضبان
واحنا رسمنا ليه
زنازينه
الإنسان هوّ
الإنسان
الحيره بتعوج
تفكيره
ولو مسكون بالغربه
ف وطنه
سهل عليه يسقط
ويبيعه.
زمن خامس/
طلع الشيب ف شبابى
وشب
فوق أعصاب الليل
شدّانى
تعب القلب (
ياسلوى) بجد
وانا عارف إنك
سمعانى.
ليه مضطر أساوم
غضبى
واتسنّد على طيبة
طبعى؟
بكره ضعفى لمّا
القانى..
واقف ضدى..
بكره خوفى لو
رتبنى
واهرب لو حددنى
البرد
ومتحملش أشوفك
كدبه
صدقى الأبيض فيها
إسود
والعصفور بيعذبه
قوته
وجناحه من طبعه
إتشد..
ليست هناك تعليقات:
إرسال تعليق