بُكره قللى
إنك مشيت
هشّيت وجودك م الزمن
وعشت موتك بالحيا
من غير لا ديّا ولا تمن.
وإنك رشيت الحلم يسكت
ولقلبك العاشق عصيت
ياما ناديت
وعليك كتير
م سمعت غير صمتك هدير
ماشى لوحده ف الغريق
مهزوم كسير
وأسير يكابد م الألم
فى توهة العدم الضمير.
على فين وخدنا يا سكات
وبلاد ف زنقّة زُل عضعضها الشتات
والصبح سك الباب دخوله
راح يعمل إيه فى شعب مات.
فجأه لاقيتك بالأمل
بتعدّى بالحلم الطريق
بتكسر الصمت اللى شاب
وطّّوّح الحُكم العذاب
والعتاب ملهوشى معنى
وانت بترشرش وجودك بالإياب
أه يالمدان الملتقى
يا قصة العشق الجميل
يأحلى أيام الغرام المفتدى
كان الصدى
طوفان من القلب السلام
يرفع على كل البيوت
والشوارع
رايات هديل
والمستحيل إنّك تعود تانى يا ليل
يلبسنا لونك
نسمع لقولك
أبو لهجه بتعلمنا كيف
نكتب ضباب
والحلم طيش كان ف الغياب
ياحُرقة القلب اللى نوره
م السما
أه يا سنين المهزله
كفياك يا ليل تكتب عمى
كفياك يا ليل تكتب عمى.
ليست هناك تعليقات:
إرسال تعليق