الخوف ..
ضربه بيسكت فيها شموخك
لحظه بتكتب ليك وساويسك
ضلمه ف عز الضهر
تبحلق فيك
وانت ما ليك
إلا نشيد وكلاه العتّه
أحلام عانس
ليل موالس
حارس دايس على أنفاس الصبح معاول
وما نيش طايل أهرش قلبى
اللى تملى واكلنى عليك
واديك لسه جوّه جيوبك
بدّعبس على إيه مش عارف؟
وكأني مضطر أنا ليك
وكأنك مزقوق تعاندني
مقق عينك يا الضهريه
ف الكراس الخط المصري
ربش فراخ
طخ طراخ
شاخ النفخ ف روحك صدّا
وقتك عدّا
ولا ليك بين الظن محطة
ليه عمّال تقلع ف أساسك
ف الإغما قالب ورا قالب
ليه مش قابل من كلام
ولا قابل إنك تتعاتب
يا مغارب عدّى على بكره
وقليله ميجيش ناحيتنا
بهجتنا أتخطفت منينا
لهجتنا خرابش وضوافر
واللى يعافر
قطر الخيبه خدُ ف رجليه
وإنت يا إيه
مش عايز أسمعلك صوت
أنا مش فيك / ولا ليك فيا
دا بإيدك ياما شفت أزيّه.
ليست هناك تعليقات:
إرسال تعليق