فين الشّعب؟؟؟؟
اللى مشايف رسم لإسمه
ولاجمله تعبّر عن شوفى
وتفسّرلى حاله دا ليه
يمكن سافر لبلد تانيه
بيدورعن صوره لشكله
فين الشّعب؟
بعد م ضاعت منّه ملامحه
وسأل روحى إزاى ألاقيه
ليه إتسيّس ياكل جوعه
وقريب راح يشرب عطشه
وموافق يكدب على روحه
وشايف إنّه بيلعبوا بيه
كل حياته كلام ع الماضى
ع الفاضى باع كل ما ليه
والحاضر مأسوف على أمره..
حيقابل بكره على إيه
دايماَ كان بيكسّرهمّه
ومعافر ولا حد يهمّه
يكنس كل ظروف الضّلمه
تتكحل بالصبح عنيه
كان صوته طالع من راسه
ولا قادر قرّب لأساسه
وان طيف هبّط لحظة غفله
يتعلّق مخنوق بإديه
مش إنت اللى تقول مش ذنبى
الدنيا ضاقت من همّى
والحق القلقان مستنّى
حد يشيله يعارك بيه
كان متصالح مع تقاليده
والسكّه ماشيه لتأيده
والتّشويش قارى ألاعيبه
والمهزوم ماشى لوحديه.
شعبيه غلباها الطيبه
حسبتها م كنتشى عبيطه
اللقمه تنقسم إتنين
والدنيا
لوبرد اتعافى
العّفه لحافه يغطيه
كان يدّى وبينكر ذاته
ولا فكّر يرضى ملزّاته
وسلالم شكّل زلاته
الحكمه ف طبع تعلّيه
متوحّد جدّامع أرضه
ولا عمره اتنكّر لوجيعته
من غير وطنه ومن غير ناسه..
م تساوى الدنيا ف عنديه
ليه حوّد للناحيه التانيه
واتعود ع الطاعه العميه
وتعلّم كيف يفرش دمه
للأغراب يتمرّغوا فيه
متخشّب ديماَ مع صمته
مش عايز يقعد مع نفسه
بيكابر مسنود على ضعفه
ويبوس رجل بتعلى عليه
إتغاضى عن كل احلامه
ولاعارف قيمه لكيانه
وشبابه شاخ قبل أوانه
حتّى النّخوه كفرت بيه
حتّى صلاته ...
على ميت قبله
ومنين م العيشه تولّيه
قرص فياجرا يطيّب خاطره
وحشيشه ف لمّه تكفّيه
مش شعب اللى بياكل بعضه
وينكت على على خيبة أمله
ومستنّى اللى يمدّله إيده
برغيف عطّن ساومه عليه
مش شعب اللى يدوس أحاسيسه
ويعبّيها نشاز براويزه
الصّوره صبحت مقلوبه
وعايشها ماشى على إديه
ولا شعب اللى يطارد فكره
وبسجّان ركباه شياطين
وان قاوح يكتم على نَفَسُه
شد الدنيا من تحتيه0
ولا شعب اللى يغيّب عقله
وساحب شومه وواقف ضدّه
وان لمَّه ف جيبه يعدّيه
وان مقدرش عليه ينفيه
أنا عارف إنك مش إنت
ولا يوم كنت ابليس ولا جنّى
قوم خلّينى أخيّب ظنّى
زيّك / الغُربه متلقشى عليه
المؤمن أحرص على نفسه
من جُحر وسكان العتمه
اللدغه بتشكّل أزمه
وخبيث خُبثه بيوطّيه ولوعايز؟ تقدر تطويه
ولو الدنيا بتسند ضهره
على إيدك راح يعلن موته
ولا حتبقّى قبر يلمّه
ولاحفره راح تقبل بيه.
